Их Багшийн Хайр – Баба Саван Сингх Жи (цагаан хоолтон)-гийн ‘Оюун Санааны эрдэнэс’ номоос, нэвтрүүлгийн 2-ын 2-р хэсгий

Бид одоо Хазур Махараж Баба Саван Синг Жигийн (цагаан хоолтон) “Сүнслэг Эрдэнэс” номоос Их Багш шавь нартаа авралд хүргэх замыг туулахад нь туслахын тулд бүх хэлбэрийн хайрыг харуулдаг болохыг тайлбарладаг 21-р захидлыг үргэлжлүүлэн хүргэнэ.

21-р захидал

“Хамгийн өндөр түвшний Гэгээнтнүүд эвдэрч устах аливаа зүйлсийг огт гуйдаггүй. Тэд Эзэн БУРХАН-аас Эзэн БУРХАН-ыг гуйдаг, Гүрү Нанакын хэлснээр: ‘Би Танаас юу гуйх вэ? Юу ч тогтмол биш. Бүх зүйл мөхдөг, яг одоо намайг харж байхад ч. ’

Энэ нь Эзэн БУРХАН-ыг эс тооцвол бүх зүйл мөхөж устах бөгөөд тэр (Нанак) мөхөж устах зүйлсийг хүсэхгүй байсан гэсэн үг юм. Түүнд зөвхөн Эзэн БУРХАН хэрэгтэй байсан, өөр юу ч биш. Тэр хэлсэн: ‘Хэрвээ бүх ертөнцийн баялгийг нэг талд, Эзэн БУРХАН-ы хайрыг нөгөө талд тавьсан бол Эзэн БУРХАН-ыг хайрлагчид зөвхөн Эзэн Бурханыг л гуйж, баялагт санаа зовохгүй. Эзэн БУРХАН-ы хайраар дүүрсэн хүнийг бүх ертөнц дагадаг.’

Өөр нэг шалтгаан нь энэ ертөнц дэх олз, гарз нь бидний үйлийн үрээс хамаардаг явдал юм. Бидний олон хичээл чармайлт үйлийн үрээс маань хамаарч бүтэлгүйтдэг, тэдгээр нь зорилгодоо хүрэх тавилангүй байдаг. Хэрвээ бид эдгээр зорилгодоо хүрэхийн тулд Нэрсийг, сүнслэг дасгалыг давтаад бүтэлгүйтвэл Эзэн БУРХАН хүсэлтийг маань биелүүлээгүйн улмаас, Түүнд итгэх итгэл маань буурах болно. Энэ нь бидний сүнслэг дэвшил, хайрын сэтгэлд саад учруулах болно. Бидний үүрэг бол ертөнцийн хэрэг явдалд чадах бүхнээ зориулж, гарсан үр дүнг Багшийн Хүсэл Зориг гэж хүлээн авч сэтгэл хангалуун байх явдал юм.

Энэ Зам мөр дээр дотоод ертөнцдөө нэвтэрч чадаагүй, дотоод хараагаараа Их Багшийг хараагүй, уур хилэн, хүсэл шуналын шатуудыг давж гарч чадаагүй олон хүн байдаг. Тэд бүхнийг доод оюун ухааны заавраар хийж, буруу үйлдлээ Багш тэднийг идэвхжүүлж байна эсвэл Бүтээгч Эзэн үүнийг үүсгэж байна гэж зөвтгөдөг. За тэгвэл, энэ бол доогуур би-гийн тэднээр тоглож буй арга мэх юм.

Муу үйлдэл нь бидний доогуур хүсэл эрмэлзлээс үүдэлтэй бөгөөд бид үүнийхээ хариуцлагыг Их Багш эсвэл Эзэн БУРХАН-д тохдог. Сүнс маань дээш дэвшиж, дотоодын Их Багшийг үзэж, Түүнтэй тэнд ярилцаж чадах хүртэл бүх бурууг бид Их Багшид бус доогуур оюун ухааны зааварт тохууштай.

Дотооддоо Их Багшаа хардаг болж, маш өндөр сүнслэг түвшинд хүрсний дараа л, зөвхөн тэр үед л болсон бүхэн Түүний үйлдэл гэж бид хэлж чадна. Тэр үед гэм нүгэл гэж үгүй, учир нь гэм нүгэл бидэнд оршдог, Их Багшид биш. Тиймээс сүнслэг сүсэг бишрэлтэн доод би-гийн арга мэхэнд орохоос болгоомжлох хэрэгтэй. Тэр зөөлөн, өршөөнгүй байх ёстой.

Хэрвээ та бүхэнд бясалгалын жинхэнэ сүнс байсан бол та нарт хэлсэн зүйлд инээгээд л өнгөрөх байсан, уур хилэнд автахгүй байх байсан. Хүчирхэг, тэвчээртэй сүнсийг хорин хүн ч — үймүүлж чадахгүй. Тэгэхэд би Аялгууны Урсгал та нарт нөлөө үзүүлсэн гэж хэлэх байсан. Гэвч үүний оронд та нар өөрийгөө хянаж чадаагүй төдийгүй нөхдөө түгшээсэн нь зохисгүй юм.

Би та бүхэнд бие биеэ буруутгах, зэмлэх сэтгэлээ цэвэрлэж, харин бие биеэ гэсэн хайр, энэрлээ нэмэгдүүлэхийг зөвлөх байна. Хүн бүр өөрийнхөө алдааг хүлээн зөвшөөрч, нөгөөгөөсөө уучлалт гуйж, хайр, сүсэг бишрэлээр өсөх хэрэгтэй.

Гэхдээ би Давтахаа зогсоох ёстой гэж хэлэх гэсэнгүй. Давтахыг хэнд ч сонсогдохгүйгээр зөвхөн оюун ухаандаа хийх ёстой. Энэ нь харуулах бус ухаан бодлыг тайвшруулах зорилготой. Чухал зүйл бол ухаан бодлыг хянах явдал юм. Энэ нь нарийн арга мэхтэй бөгөөд та нараас ч өмнө зөнч, амьд дүрүүд гээд олон төрөлтнийг арганадаа оруулж байсан. Би ухаан бодол нь ямар ч хөгжимд бүжиглүүлж, үйлдэл хийхэд хүргэсэн олон хүнийг харсан; гэтэл хүмүүс үүнийг ариун Сүнс ирсэн эсвэл тэдний сүнсийг дээд түвшинд аваачсан гэж боддог. Муу санаа ухаан бодолд оршдог ч бусдад үүнийг тохдог.

Р.С. бол Жинхэнэ Зам юм; иймд гаднах харагдцаар хүмүүсийг төөрөгдүүлэх нь их нүгэл юм. Ийм хүмүүстэй нөхөрлөхөөс зайлсхийх хэрэгтэй.

Миний үгс та нарт тааламжгүй санагдаж магадгүй. Гэхдээ энэ бол миний үүрэг. Зүгээр бодоод үз дээ, хүний амьдрал үнэхээр үнэ цэнтэй бөгөөд өнгөрсөн сайн үйлийн үрийн дүнд олгогдсон юм. Энэ амьдралыг бидэнд хүүхэд өсгөх эсвэл өөрсдийгөө зугаацуулахын тулд олгоогүй. Эдгээр бүх үйлдлийг хамгийн доод түвшний амьтад ч гүйцэтгэдэг. Хүн ба доод бүтээлүүдийн хоорондох цорын ганц ялгаа нь хүний энэ амьдрал энд Эзэн Бурханыг харах, энэ амьдралдаа хамгийн дээд Сүнслэг Түвшинд хүрэхэд зориулагдсан явдал юм. Үүний нэг минут бүр сая сая долларын үнэ цэнтэй.

Бид энэ бие махбод, асурын хүрээ болон учир шалтгааны биеэ орхих ёстой. Ийм үед дэлхий ертөнц, түүний харилцаа холбоо болон таашаалын үнэ цэнэ юу вэ? Дэлхийг түр буудаллах дэн буудал, хамаатан саднуудаа замын хань, хамт аялагчид гэж үзэх хэрэгтэй. Бидний гол зорилго бол Бүтээгчтэйгээ нэгдэх, мөн бидний дайсан болох тачаал, уур хилэн, шунал хүсэл, хомхой сэтгэл, хүлээс, бардамналаас аль болох зайлсхийх юм. Бүх цаг үед зүрх сэтгэл маань Багшийнхаа төлөөх хайраар дүүрэн, оюун ухаан маань дэлхийн хаант улсыг өгсөн ч, эсвэл дэлхийн хаант улсыг булаасан ч огт сандрахгүй тийм зоригтой байх ёстой. Оюун ухаан ийм болсон үед, Их Багш түүнд Өөрийн Жинхэнэ Гэрлийг нэвтрүүлдэг.

Миний бичсэн бүхэн та нарын тусын тулд, ариусгалд зориулагдсан бөгөөд давамгайлах эсвэл гайхуулах зорилготой биш юм. Энэ бол та нарын төлөөх миний хайрын үр дүн юм. Та нарын улс орны ёс заншил, харилцааны хэв маяг үүнийг ийм Гэрэлд хүлээн авах эсэхийг би мэдэхгүй байна.”